يا مرحب بزوار الليل !!

I do not agree with what you have to say, but I'll defend to the death your right to say it --> Voltaire

طبعا انا بدأت بكلمة فولتير لاني عارف ان ناس كتير مختلفه مع افكار مايكل نبيل ، و ناس كتير هتزعل اني بدافع عنه و للتصحيح انا لا بدافع عنه و لا عن افكاره ؛ انا ببساطه بدافع عن قضيه محدده و هي اعتقال اصحاب الرأي بغض النظر عن اتقاقي مع الرأي ده او اختلافي

و عشان نعرف الموضوع محتاجين نعرف ايه هي القضيه اللي اثارها المدون مايكل نبيل و هي موجوده في مدونته في اللينك ده تحت عنوان: الجيش و الشعب عمرهم ما كانوا أيد واحدة

و مش هتكلم هنا عن كل الممارسات الغريبه للجيش و اللي مايكل موثقها كلها و معظمنا شاف كتير منها او اكتر و اختلفنا كلنا في تحليلها و قلقنا ساعات من تحليلاتنا و تحليلات ناس تانيه لكن كنا بنستعير المقوله الشهيره للجيش " رصيدهم يسمح " بس اعتقد اننا بنقرب من اليوم اللي الناس هتتعب جدا من الافعال الغريبه ده و تقول للجيش " لقد نفذ رصيدكم " وافتكر احنا بنقرب كل يوم من اليوم ده ، وياخوفي يكون الوقت متأخر اوي وما يفضلش غير الندم

العودة إلي افريقيا الأم

الحقيقه مش قادر اوصف مدي سعادتي بخبر زيارة شرف للسودان شمالا و جنوبا ؛ حسيت ان اخيرا ان مصر هتبتدي تاخد خطوات محترمه ناحية افريقيا مش بس علي المستوي السياسي - و اللي كنا بنتعامل معاه علي مستوي الرغي الفاضي بس - لأ كمان علي كافة المستويات الاقتصاديه و الثقافية و المصالح الطبيعيه المشتركه و اللي اهمها نهر النيل ، و للاسف بتجاهلنا للقضايا الافريقيه علي مر السنين خسرنا كتير و طبعا اهم الخساير هي احتمال ضياع حصة مصر في مياه النيل و هي كارثه بكل المقاييس

تعالوا بقي نشوف بقي الفايدة المشتركة لمصر و الدول الافريقيه في حالة التعاون المشترك ده ، و بأكد علي كلمة التعاون المشترك بعيدا عن كل الامبرياليات العسكريه او حتي السياسيه و اللي بتقوم علي الاستغلال للشعوب و ثرواتها

من الناحية السياسيه : شفنا اكيد نتيجة ابتعاد مصر عن افريقيا في الفتره اللي فاتت و كان ابرزها تكتل معظم دول حوض النيل ضد مصر و تصويتهم علي اتفاقيه تحرم مصر من جزء من حصتها في مياة النيل ( اللي مش مكفيانا اصلا ) و للاسف كنا بنعالج بشكل غريب و نبصلهم من فوق بدل ما نقرب منهم في قضاياهم القوميه و نحاول نساعد في حلها ع الاقل لمجرد التضامن و المشاركة المعنويه ، و الغريب ان دول غربيه كتير عرفت اد ايه افريفيا مهمه ع الصعيد السياسي و كان ابرزهم الولايات المتحده و اللي شفناها بتتحرك جوا افريقيا و اللي مش مصدق كلامي يسأل عن القوات العسكريه الامريكيه " أفريكوم " و اللي بتضم دبلومسيين و اللي بغض النظر عن اهدافها فهي دور واضح للغرب اللي الافارقة رفضينه و السؤال بقي احنا فين ؟! و طبعا ما اقصدش الوجود العسكري

من وجهة نظري لازم يبقي لنا وجود سياسي تعاوني واضح مع الدول الافريقيه لضمان الصداقة التاريخيه و التحالف السياسي لقطع السبل ضد اي حد انه يوجه افريقيا ضدنا ؛ احنا عايزين استثمار و تنميه و ده مش هيجي غير بأستقرار سياسي مع دول الجوار ، كمان ده هيدي مصر ثقل في القرار السياسي الدولي نتيجة التحالف ده

من الناحية الثقافيه : لازم نبقي متأكدين ان سياسة الغزو العسكري ده راحت لحالها بس برضه مانقدرش ننكر نوع جديد من الغزو هو الغزو الثقافي و غزو تاني هو الغزو الاقتصادي و لما نتكلم عن الغزو الثقافي اللي انا بكرهه جدا لانه هدفة الاساسي محو ثقافات الشعوب و تحويلها تماما و بالتالي السيطره عليها ، لكن اللي احب اشوفه هو الانفتاح الثقافي الحر ( قومية انسانية كبيره ) ؛ عايزين نوصل للناس ده : المصريين بيفكروا ازاي ، بيعيشوا ازاي ، كانوا عايشين ازاي ، تاريخهم ، فنونهم ، تراثهم الشعبي ونعرف عنهم بالتبادل طبعا

النوع ده من المد الثقافي مهم جدا لانه هيقربنا للدول الافريقيه من الناحيه العقليه و الفكريه ، و بالتالي عمرنا ما هنشوف رفض شعبي لمصر و المصريين بعد كده هناك في حالة التعاون الاقتصادي او السياسي زي ما هو حاصل مع امريكيا في حالة " أفريكوم "

من الناحية الاقتصاديه : و هنا برضه بأكد علي التعاون الاقتصادي مش الاستغلال الاقتصادي و امثله لده :

• مصر تعتبر سوق استهلاكي كبير و بالمقابل افريقيا مصدر قوي للحوم و الحقيقه اني فرحت جدا لما شفت من يومين خبر اتفاق بعض المستثمرين المصريين مع بعض مربين الماشيه في السودان لتوريد الف طن شهريا من اول ابريل بسعر 28 ج للمستهلك
• بإذن الله في الفتره المقبله هنشوف صناعة قوميه قويه خصوصا علي مستوي الصناعات الصغيره و اللي ممكن تبقي افريقيا سوق خصب و بكر للتسويق و طبعا ده محتاج شوية وقت عشان نقدر نصنع منتج قادر علي المنافسه
• بعض دول افريقيا غنيه جدا بالموارد المختلفه و مصر غنيه جدا بالكوادر و القوي العامله و الشركات اللي قادره علي المنافسه ، خلونا بقي نحصل باقي دول العالم و خصوصا الصين و اللي ابتدت تتجة ناحية افريقيا و بقوه

آن الاوان بقي نبص شويه لافريقيا و ندرك اهميتها ، و هيساعدنا في ده ان صورة مصر القديمه ابتدت تتغير و افريقيا و الدول العربيه بتعتبر الثورة المصريه هو الحدث اللي هيرجع مصر لحضن افريقيا ، بلاش بقي ندور وشنا الناحية التانيه و نعمل مش شايفين بحجة ان الموضوع صعب ؛ اكيد صعب و طويل بس خلونا نبتدي 

قانون تجريم الاعتصام و التجمهر

نص مرسوم القانون

(1) يعاقب بالحبس أو الغرامة التى لاتقل عن خمسين ألف جنيه ولا تجاوز مائة ألف جنيه أو بإحدى هاتين العقوبتين كل من قام أثناء سريان حالة الطوارىء بوقفة احتجاجية أو اعتصام أو تجمهر أو شارك فى ذلك بحيث ترتب على تلك الوقفة أو الاعتصام أو التجمهر منع أو تعطيل أو إعاقة إحدى مؤسسات الدولة أو إحدى السلطات العامة أو إحدى جهات العمل العامة أو الخاصة عن أداء أعمالها.

(2) تكون العقوبة الحبس مدة لا تقل عن سنة وبالغرامة التى لاتقل عن مائة ألف جنيه ولا تجاوز خمسمائة ألف جنيه أو بإحدى هاتين العقوبتين إذا استخدم الجانى القوة أو العنف أثناء الوقفة أو الاعتصام أو التجمهر أو إذا ترتب على الجريمة تخريب إحدى وسائل الإنتاج أو الإضرار بالوحدة الوطنية أو السلام الاجتماعى أو الإخلال بالنظام العام أو إلحاق الضرر بالأموال أو المبانى أو بالأملاك العامة أو الخاصة أو احتلالها أو الاستيلاء عليها.

(3) ويعاقب بالحبس والغرامة التى لاتقل عن ثلاثين ألف جنيه ولا تجاوز خمسين ألف جنيه كل من حرض أو دعا أو روج بالقول أو بالكتابة أو بأية طريقة أخرى من طرق العلانية لأى من الأفعال السابقة.

بيقولولنا ما تتخضوش ده في فترات الطوارئ بس و الحقيقه ان ده سبب ادعي للقلق ؛ لأن فترة الطوارئ ده هي الفتره الانتقاليه و اللي هتشكل شكل مصر الجايه و اللي مفترض فيها اننا نبقي اكثر حرية في ابداء الرأي و اظهار مواقف شعبيه في كل ما يمثل مساس بمكتسبات الثوره في ظل ثورة مضاده الكل اقر وجودها.

بيقولولنا ده في حالة اعاقة العمل و العنف بس انما التظاهر السلمي حق مشروع ، و هنا احب اقول ان المفترض ان ده كان بديهي مش محتاج قانون و ليه يا سعادة المشرع ما طلعتش قانون ينظم الحق ده بالكامل عشان ما يحصلش لبس بين المشروع و غير المشروع و ازاي اصدق الكلام ده بعد فض اعتصام طلبة كلية اعلام السلمي بالقوه و ازاي تأكد ان الشرطة العسكريه هتنفذ القانون من المنطلق ده و مش منطلق انتوا بتتظاهروا ليه رغم وجود قانون بيجرم التظاهر " و ده حصل امبارح في التحرير "

و لو بصينا علي نص القانون فأنا لو كنت في مظاهره سلميه و جة بعد كده شخص لسبب او لاخر بنيه سليمه او " خلاف كده " - رجالتكم يعني - و عمل شغب و حدث ان " العمل تعطل " - علي اساس ان هضرب عن العمل والمكن هيشغل نفسة - او ما شابه يبقي كل المشاركين في المظاهرات مدانين بحكم القانون و المنظمين علي رأس المتهمين طبعا. 

كام واحد كان بيفكر يتظاهر ضد الفساد في بعض قطاعات الدوله و دلوقت مش قادر ياخد موقف بعد القانون خصوصا ان قانون زي ده صادر عن جهتين بيمثلوا قبول عند الشعب المصري ، وزارة شرف و الجيش ؛ و هي مش مظاهرات و وقفات زي ده هي اللي جابت شرف و حلت امن الدوله و لا احنا بننسي ؟!

بعدين الفرق بين المظاهرات الفئويه " المشروعه برضه " و المظاهرات ذات المطالب الشعبيه واضحة وضوح الشمس ، يعني تقدر تقولي موظفين ماسبيرو اللي بيطالبوا بتطهير المبني من رموز الفساد ازاي احطهم في خانه واحدة مع موظفين ماسبيرو برضه اللي بيطالبوا بتحسين اوضاعهم و للاتنين كافة الحق في التظاهر طبعا ؛ بس دي قضيه و دي قضيه ، ما تجيش سعادتك و تقولي دي مطالب هتعطل العمل و تعمم ، محدش بقي بالغباء ده 

بعدين ما البطء ده اصلا اللي بيخلق المظاهرات " الله! ما تحل يا سيدنا " مستني ايه ؟! الناس خلاص زهقت من ام الوشوش ده ، خصوصا في ملفات زي ملفات الاعلام و الجامعات

في الاخر احب اقول ان لما حد كان بيقولي انت مش قلقان علي اللي وصلناله لحد دلوقت و ان الثوره تاخد شكل غير اللي كنا بنتمناه و بالتالي تأثر بالسلب علي شكل اللي جاي كله ، كنت بقولهم اني قلقان و مش مرعوب و ان الرهان علي الناس و الدليل ان محدش ممكن يقبل انه يقفل بقه تاني لانهم ببساطه مابقوش يخافوا ؛ يقوم يطلع قانون هدفة الوحيد ان الناس تخاف تتكلم ؟؟!!! احنا هنهرج !!!

إتأخرت عليكم ؟!!

مبدئيا بعتذر عن فترة الانفطاع ده لقراء المدونه القليليين " وان كنت اشك ان في غيري بيفتحها :) " و اللي كان سببها انقطاع النت في مصر و بعدها الخط الارضي عندي اللي مجاش غير من يومين و طبعا لخبطة كبيره بسبب اني مش حافظ اغلب باسورداتي " محدش يشتم :) " ، عموما الدنيا بقت تمام نوعا ما دلوقت

طبعا كان نفسي اكتب دقيقه بدقيقه عن كل الاحداث اللي فاتت و اللي كانت اسرع من كل اقلامنا و كاميراتنا و اتصالاتنا  ، و هبقي احاول اسرد بعدين ان امكن خصوصا ان الاحداث ده متشابكه بشكل كبير مع الاحداث الحاليه و اعتقد انها هتأثر بالتأكيد علي اللي جاي

كان نفسي اكتب بشكل اوسع عن يوم 25 يناير و احداثة و مشاهده و حواديته و ايه اللي دعي ليه ، و اليومين اللي قبل جمعة الغضب ، و عن جمعة الغضب ، و الفراغ الامني و السجون و اللجان الشعبيه ، و الموقف الدولي وخطابات مبارك و شكل الاعلام في الفتره ده ، و رأي الشارع قبل التنحي و بعد التنحي و المظاهرات "الفئويه" و عن الجيش و دوره و اداءه و عن وزارة شفيق و وزارة شرف و الكارثة الطائفيه اللي كانت هتنفجر و " ربنا يستر " ، وعن الاحزاب و الاخوان ، و عن الدستور و شكل المرحلة الانتقاليه .. و .. و..  و طبعا عن الميدان

ملفات كتير جدا فوق ما اي حد ممكن ممكن يتصور ، المشاعر اختلفت فيها و القراءات و التحليل و كمان القدره علي الاحتمال ، عموما زي ما قلت هبقي احاول اكتب كل اللي شفته ان امكن بعدين ؛ عشان يبقي عندنا فرصه نتابع الاحداث الجاريه و اللي بتجري هي كمان و اتمني اننا نقدر نديها حقها من مشاركه و مشاهده و قراءه و تحليل