الصفحات

الخميس، يناير 27، 2011

25 يناير - شاهد علي الحدث



جامعة عين شمس
خرجت الصبح علي جامعة عين شمس الشوارع هاديه و الجامعه هاديه ، امتحنت و خرجت في نص الوقت ، اتصل بيا صاحبي الوحيد اللي قاللي انه خارج و اعتذر ، وقعدت في الجامعه علي امل اني الاقي اي حاجه مالقتش ؛ ما كنتش حابب اني اخرج لوحدي ، المهم قعدت بتاع 5 دقايق فتحت فيها النت و عرفت ان في مظاهرات في الوقت ده في باب الشعريه و مظاهرات تانيه عند دار القضاء العالي و عرفت ان مظاهرة جامعة القاهره اتلغت و ان باقي الاماكن زي ما هي و قررت اخرج علي شبرا زي ما كان في نيتي من الاول 

قبل المظاهره بساعه
ركبت المترو و رحت عند دوران شبرا كانت الساعه تقريبا 1:00 و شويه ، الدوران في جهاته الاربعه مليان امن بأزياء مدنيه و رسميه و عربيات و مدرعات و عربيات مطافي ، وقفت عند بتاع العصير و شربت كوبايه عشان يبقي عندي فرصه اراقب الموقف كويس بحجه مقبوله ، و الصراحه الموقف كان يقلق ؛ لانه رغم العدد المهول ده من الامن محستش ان في اي متظاهرين و اتضايقت جدا لما حسيت ان المظاهره ممكن تفشل ، عموما طمنت نفسي و قلت لسه بدري الميعاد فاضل عليه ساعه الا ، و مشيت في شارع شبرا و قعدت في اول محطة اتوبيس و فتحت النت تاني لاقيت مفيش اي تغيير في مكان مظاهرة شبرا ، و لاقيت مظاهرة دار القضاء وصلت التحرير فأخدت قرار ان لو المظاهره ما اتعملتش هنا لحد 2:30 هروح التحرير

الشراره الأولي و فئات المتظاهرين
الساعه 1:50 اتحركت ناحية الميدان و لاقيت فعلا مجموعات متفرقه في كل حته - اتنينات و تلاتات - و مجموعه بتاع تلاتين ع الرصيف التاني - شباب و بنات ، رجاله و ستات ، بدل و جلاليب ، مسيحين ومسلمين - و مع اول هتاف ليهم الامن عمل عليهم كوردون ، كلنا جرينا عليهم انا و كام واحد عرفنا ندخل الكوردون و الباقيين معرفوش خصوصا ان الامن شدد الكوردون ده و بقينا نهتف جوه و هما بره و الامن لا عايز يخرجنا و لا يدخلهم 

كسر الكوردون الامني
بعد كده قدرنا نخرج من الكوردون و انضمينا للمجموعه اللي بره اللي كان عددعم بيزيد اكتر و اكتر ، و الامن جري عشان يعمل علينا كوردون جديد ، و هنا انفصلنا عن المجموعه و جرينا ناحيه شارع جانبي ، كنا حوالي 30 واحد ، و لفينا من الشارع الجانبي و رجعنا تاني للميدان بس علي ناصية شارع خلوصي و فضلنا نهتف و الناس تنضملنا خصوصا اننا لما لاقينا ناس من اهالي شبرا واقفين رددنا هتاف " يا اهالينا يا اهالينا .. يا اهالينا انضموا الينا .. الحريه ليكوا و لينا .. الكرامه ليكوا و لينا "

انضمام أم انفصال
في الوقت ده كان في رأيين وسطينا ، رأي قال احنا نرجع للمجموعه الاصليه لان عددهم اكبر ، و ناس تاني قالت احنا الافضل نبقي مجموعتين عشان نشتت الامن و كلنا لاقينا الرأي التاني أفضل ، في الوقت ده الامن قرب عشان يحاصرنا تاني بعد ما نجح انه يحاصر المجموعه الاصليه و احنا لما لاقيناه بيقرب اتحركنا في شارع خلوصي و ناحيه شارع الترعه و وقفنا علي بعد 100 متر و فضلنا نردد الهتافات و اكتشفنا ان عددنا زاد لاكتر من 70 - 80

المتظاهرون ينظمون المرور
كان في مجموعه مننا اتنين او تلاته بتبعد الناس عن الطريق - اللي كانوا بيخرجوا عن الصف من غير قصد مع الحماس الشديد - و تدخلهم في صف موازي للرصيف عشان ما نعطلش المرور ؛ عشان محدش بتحجج بعدين و يفولوا ان المتظاهرين عطلوا المرور

نحو شارع الترعه البولاقيه
برضه في الوقت ده واحد مننا اقترح اننا نتحرك لشارع الترعه لما لاقينا الاهالي بتنضم لنا ؛ علي امل اننا نضم عدد اكبر و كلنا وافقنا علي ده و اتحركنا و احنا بنهتف طول الوقت و الناس في الشارع كانوا لاما بيضحكوا علينا أو ساكتين تماما أو بينضموا لنا و اعدادنا ابتدت تزيد جدا و كنا كل ما نشوف عدد كبير من الناس نردد الهتاف الجميل بتاع يا اهالينا يا اهالينا ....

الالتفاف الشعبي الجميل
و مع كل متر كنا بنمشيه كان حماسنا بيزيد و صوتنا بيعلي و عددنا بيكبر ، الناس بتنضم لنا في كل متر و حتي اللي ما كانش قادر ينضم كان بيشاركنا بالتصوير او بالهتاف من البلكونات - الله - كان جميل الاحساس ده و انت شايف عايله بحالها في بلكونه بتهتف معاك و بتقولك بهتافها ده انهم كانوا نفسهم يبقوا معاك في الشارع بس مش قادرين لسبب او لاخر و مش هقدر انسي يمكن لسنين جايه الراجل العجوز الجميل اللي كان خارج بنص جسمه من شباك الميكروباص اللي ماشي في الشارع و هو بيلوح بأيديه الاتنين و بيهتف هتاف اشبه بالصراخ " يسقط يسقط حسني مبارك "

الامن و تنظيم المرور
المهم و صلنا شارع الترعه و مشينا فيه ناحية رمسيس ، و في شارع الترعه العدد كان زاد جدا لدرجة ان بقي من المستحيل ان الرصيف لوحده يستوعبنا من غير ما يأثر علي وحدتنا فأضطرينا ناخد جزء كبير من الشارع ، في الوقت ده الامن كان اهملنا تماما ؛ لاننا اتحركنا في عدد صغير من الميدان اللي كان كل الامن متواجد فيه فطبيعي انهم يركزوا مع العدد الاكبر الثابت ، لكن لما وصلنا لشارع الترعه و زي ما قلت اضطرينا ناخد جزء كبير من الشارع ؛ لقينا 3 ظباط مشيوا قدامنا و ابتدوا ينظموا المرور

هما خاطفينا ولا ايه ؟!
في نص شارع الترعه ناس قالت هو الامن هيحركنا ولا ايه دوول بيجرونا لكمين عشان يحاصرونا ، ومعظمنا اتفق علي الفكره دي فخدنا قرار اننا ندخل شمال في احد الشوارع الجانبيه و قد كان ، و في الشوارع الجانبيه عملنا جوله سريعه و اهالي حواري شبرا كانوا بينضموا لنا باعداد كبيره بشبابها ببناتها باطفالها بستاتها و بعض كهالها كمان و في الحواري اطمنا لما لقينا ال 3 ظباط ما جوش ورانا فقررنا اننا نرجع علي شارع الترعه تاني

الوعي الشعبي الجميل
رجعنا علي شارع الترعه تاني و في الطريق لرمسيس حصل موقفين مش لطاف و في نفس الوقت في منتهي الروعه ، الاول : لما واحد مننا قال للناس اللي في الشارع " انضموا لنا هو احنا بس اللي مصريين ولا ايه " بشكل فيه توبيخ للناس ده مش لطيف بس الرائع لما ناس مننا قالتله سيب الناس تقرر براحتها ، قولهم ينضموا ما توبخهمش ، التاني : لما واحد قال هتاف بما معناه - لاني مش فاكر نصه -رصاصه خدت اللي فات و رصاصه حقيره تاخد ده ، الناس قالت له بلاش الهتاف ده ؛ احنا مش بتوع رصاص ، احنا بنقول سلم ، الله ع الوعي و ع الجمال

طريقك مسدود !!
في نهاية شارع الترعه لاقينا الامن قافل الشارع ، قمنا جرينا في شارع جانبي يمين و خرجنا علي شارع شبرا ؛ قبل ما الامن يسبق و يحاصرنا ، في نهاية شارع شبرا برضه لاقينا الامن قافل شارع شبرا و مستنينا قمنا و قفنا لحد ما نتجمع تاني عشان ناخد قرار ، وفي الحالات اللي زي ده كنا بنقول هتافنا الجميل " وحد صفك .. كتفي في كتفك .. علّي و علّي و علّي الصوت .. اللي هيهتف مش هيموت "
المهم خدنا قرار اننا ندخل شارع جانبي يمين شارع شبرا و نلف من ورا الامن ، و بالمناسبه حد مننا و احنا بنتناقش طلع فوق عربيه عشان الناس تسمعه و الناس قالوا له ذنب صاحب العربيه ايه تفعصهاله ، انزل - ايه الاحساس العالي و الجميل ده - عمار يا مصر

الهروب الكبير
مشينا فعلا في الشوارع الجانبيه بحذر عشان الامن ما يحاصرناش و ده سهل في الشوارع الجانبيه و كان في ناس مننا - اتنين تلاته -  بتتقدم عشان تشوف الشارع اللي بعده في امن ولا لاء ، لحد ما ما قدرنا نوصل لفتحه شارع بعد مكان تجمع الامن و في الحته الاخيره من الشارع خدناها جري و فعلا عدينا الامن بقينا في ضهره

مجموعة شارع شبرا
في اثناء مسيرتنا في شارع الترعه مجموعه من المتظاهرين اللي في الميدان اتحركوا في شارع شبرا بشكل موازي لينا من غير ما نعرف او هم يعرفوا و في لحظه ما لفينا من ورا الامن كانوا هما قدام الامن و الامن سادد الشارع عليهم عشان ميعدوش كان عددهم اكبر من عددنا ضعفين ، تقريبا كانوا فوق الالفين و احنا فوق الالف ، المهم لما سمعنا هتافتهم فرحنا و جرينا عليهم و هما جريوا علينا و الامن بقي سندوتش في النص و فلتوا و اتحركنا ناحية رمسيس كلنا و احنا في قمة السعاده و الحماس

مظاهرة محكمة النقض
فضلنا ماشيين باتجاه رمسيس و قررنا نطلع علي مجلس الشعب ، و في الطريق الناس كانوا بينضموا لنا بأعداد مهوله ؛ خصوصا اننا كنا بنادي عليهم و كان الهتاف الغالب لما نعدي من تحت كوبري او اي مكان سكني في ناس كتير هو " انزل انزل انزل " ، و الامن لا حول له ولا قوه علي جنبات الطريق بقواته و عربياته و اكتفي بالفرجه لحد ما وصلنا عند محكمة النقض اللي كان موجود قدامها تجمع امني كبير و عدد من المتظاهرين الامن محاصرهم و هنا برضه ناس مننا قالوا نحررهم من الحصار الامني؛ خصوصا اننا عددنا اكبر من الامن بكتير و لكن الاغلب شاف ان وجودهم مكانهم افيد ؛ لانه هيعمل تفريق لقوات الامن في عدة اماكن و ده مفيد لينا

في ميدان التحرير
اتحركنا في اتجاه ميدان التحرير و لما و صلنا لقينا الاف و رغم ان عددنا كسر ال4 او ال5 الاف كان عددهم اكبر و منتشرين في كل مكان في ميدان التحرير و الامن متواجد في المواجهة لينا بغزاره  و علي الشمال بشكل اقل في شارع طلعت حرب و باب اللوق ، و هنا بس و لاول مره لاقينا كاميرات تليفزيون و تواجد اعلامي محترم نوعا ما و لقينا بعض الشخصيات السياسيه و الاجتماعيه

نحو مجلس الشعب
سيبت مجموعتي - مجموهة شبرا - عند كنتاكي و اتوجهت ناحية البؤره الاكثر اشتعالا حيث قنابل الغاز و خراطيم الميه ، حطيت الشال بتاعي علي بوقي و مناخيري تحسبا للغاز القذر " و اللي ميعرفوش : بغض النظر عن التركيب اقدر اقوله المفعول ، تهيج شديد للانف و العين و اختناق و عدم قدره علي التنفس ده غير انه سريع المفعول بشكل ملفت ؛ بأختصار لو ما جريتش من محيطه ممكن تتخنق " المهم لاقيت الامن و الشباب في حالة مد و جزر هناك ، يعني غاز و ميه نرجع و بعدها نجري ناحيتهم 

اشتباك و حوار
كان كل همنا اننا نعديهم عشان نوصل لمجلس الشعب بس فشلنا للاسف و ده ليه كذا سبب : اننا كنا مش كتار رغم العدد الكبير اللي كان في الميدان و اللي كانوا شايفين ان ميدان التحرير افضل ، و السبب التاني ان المكان ده كان مفترق طرق احنا في ناحيه و قصادنا و يميننا و شمالنا الامن فلو اتحركنا لقدام هيقفلوا علينا بسهوله و يحاصرونا ، المهم و احنا بنحاول نعدي و مع قنابل الغاز و الميه بعض الناس انفعلت و حدفوا طوب ع الامن ، اللي رد بدوره ع الطوب بطوب احنا من ناحيتنا هدينا الناس و قلنالهم لاء احنا مش عايزين عنف حتي لو هم عملوا كده و رغم ان كان صعب اننا نسيطر عليهم بس في الاخر الناس المنفعله دي بطلوا يحدفوا الطوب ، و الامن كمان بطل يحدف علينا و رفع ايديهم في اشاره منهم انهم مش هيتصادموا معانا و لاول مره قدرنا نقرب عليهم و يبقي في بينا حوار ، طبعا اتعور ناس مننا و مشفتش اصابات في الامن ظاهره غير سواق عربية المطافي اللي كانت يميننا و الناس نفسهم اللي حدفوا عليه الطوب هما اللي خدوه علي حنفية الميه


انضمام فردي و جماعي
في الاوقات اللي بعد كده لقينا الناس بتنضم في مجموعات صغبره و بشكل فردي احيانا و كان في مظاهرتين كبار واحده جايه من وسط البلد من ناحية شارع طلعت حرب و التانيه جاية من ناحية الكورنيش و مع كل مظاهره كنا بنهيص و نصفر فرحانين بانضماهم و فضل الحال هادي نوعا ما طول الوقت و من وقت للتاني هجمة من الامن و كام قنبلة غاز و بعض اصابات من المتظاهرين ، الناس تبعد و ترجع بس نوعا ما هادي ، الكل حاسس بأنتصار نوعا و حاسيين ان الشارع بتاعنا ، قدرنا نعمل اللي احنا عايزينه بشكل قمه في التحضر و بشكل سلمي من غير هتافات او لافتات لحزب او لحركه او لفئه او لطايفه ، الشارع المصري موجود و الصوت المصري موجود و منصهر فيه كل الفئات و الاحزاب و الطوايف و الحركات


نهاية فاضحه للأمن و مشرفه للشعب
انا روحت بعد كده و سبت الناس و مشفتش اللي حصل في الميدان ، بس عرفت و كل الدنيا عرفت و هم نفسهم مقدروش ينكروا في تصريحاتهم التدخل العنيف جدا غير المبرر ليهم ، لفض الاعتصام الساعه 2:30 صباحا ، و اعتقالهم المئات و تبريراتهم المخزيه ان انتوا وصلتوا رسالتكم ، رووحوا بقي ، و طب و ماذا بعد الرساله اللي وصلت ؟!! و كام الف رساله وصلناهالكم قبل كده ولا رد ؟! و ليه عايزينا ما نتظاهرش طالما تظاهرنا كان سلمي و العالم كله شهد بده ؟!


الي كل مصري
اخيرا احب اقول لكل مصري في البلد ده :
" يا اهالينا يا اهالينا .. يا اهالينا انضموا الينا .. الحريه ليكوا و لينا .. الكرامه ليكوا و لينا "
" وحد صفك .. كتفي في كتفك .. علّي و علّي و علّي الصوت .. اللي هيهتف مش هيموت "
و تحــــــــــــــــــــيا مصر يا عم




---------------------------------------------------------------------------------------------------------
تحديث : الخميس 27 يناير 2011 , 8:26 ص
لماذا خرجت هذه الشهاده ؟!

  • عايز اوضح للناس كلها مدي تحضر المتظاهرين و لأي مدي كانت المظاهرات سلميه
  • عايز اوضح للناس مدي وعي المتظاهرين و تصرفهم الايجابي ضد اي تصرف سلبي
  • عايز أأكد ان اللي قام بالمظاهره ده الشعب المصري مش حد تاني ، محدش يضحك عليكم
  • عايز اثبت للناس انها مش صعب ، احنا خرجنا 30 من شبرا ووصلنا التحرير فوق ال 5000
  • عايز أقول للناس ان فيه فايده ، و اللي نزل حس اد ايه احنا قربنا
  • عايز اقولهم الموضوع ما انتهاش ، انزلوا ما تخافــــــــــوش
و بإذن الله هبقي اكتب بعدين لو اتيحت ليا فرصه في اقرب وقت ، بعض مشاهد اثرت فيا جدا و تستحق التدوين و الوصف ، و هبقي اكتب محتوي الهتافات اللي كنا بنرددها ، و اللافتات اللي كنا رافعينها



هناك تعليق واحد: